Skiweekend Wirihorn

Am Samstimorge am Achti heisech aui vouer Freud bir Turnhaue troffe. Nachdäm aues im Ahänger verstout isch gsi, heimer üs mit zwöine Büssli ufe Wäg is Diemtigtau gmacht. Da ds einte Büssli nid so dicht isch gsi, hei du haut es Paar chli müesse früre. Ufem grosse Parkplatz acho, hei aui sofort ihri Schiischue gsattlet u de  simer zäme mitem Sässeli Bärg ufwärts gfahre. Womer dobe acho si, hei aui ihres Gepäck ir Ungerkunft verstout u när hets gheisse: Ski u Board montiere und los geits! Das wunderschöne Wätter hetme eifach müesse gniesse, ob itz ufder Piste oder ir Beiz. Ou am Carlo Janka si Sieg am Lauberhorn hetme nid verpasst! Da es äbe nid so viu Schnee het gha, simer du haut mängisch chli über Ärdmöckli gfahre ;). Me isch gfahre bis no der letscht Lift abgsteut het u när hetmesech de no dis no ir Bar igfunge fürnes chüeus Apero-Bier. Die meischte heisech de ohno vorem Znacht ä schön warmi Duschi gönnt. Mit no viu angerne Lüt, wo bim Nachtsprint mitgmacht hei, hei mir när zäme es feins Spaghettifestival dörfe gniesse. Wos es Paarne scho chli längwilig isch gsi, heisi sich miteme blööde Löu-Outo vergnüegt u hei du fasch Träne vergosse wome ihne das Outo wäg gno het. Nach es paar Jass-Rundine heimer de no id Bar gwächslet u dert 1,2 Drinks zäme gnosse. Di Einte si du scho chli ender is Bett und hei der Schlof gsuecht u di Angere heisech no vo dere Musig vo däm super DJ ir Bar lo verwöhne. Aber ou die si einisch müed worde u sisech de ou go ablege. Nach dere „erhousame“ Nacht si di erschte de oh scho wieder am Zmorgetisch ghocket. Früecher oder spöter hetme sich de ufder Piste wieder gfunge. S het zwar am Afang nochli gschneit u ungerab sogar grägnet, aber gäge Mittag hets du immer wi meh ufdo ud Sunne isch wieder vüre cho. Am haubi drü heisech aui wieder troffe für Richtig Tal abwärts ds fahre. Nacheme churze Fotoshooting heimer üs wieder ufe Heiwäg gmacht. Ds Choppige heisech du aui glücklech u zfriede verabschiedet.

Mir danke am Gurki für die super Organisation und aune angere für das wiedermou unvergässleche Erläbnis und freue üs ufs nöchste Johr!